काठमाडौँ, १७ असोज । युवा सङ्घ नेपालको बुटवलबाट निर्वाचित भएर आएको आठौँ केन्द्रीय कार्यसमिति नवौँ निर्वाचन आयोजक कमिटीमा परिणत भएको छ ।
सङ्घको शनिबारदेखि सुरु भएको केन्द्रीय पदाधिकारी बैठकबाट केन्द्रीय कार्यसमिति निर्वाचन आयोजक कमिटीमा परिणत भएको सङ्घका प्रवक्ता प्रभात विक्रम कटुवालले जानकारी दिनुभयो ।
सङ्घका अध्यक्ष नीरु पालको संयोजकत्वमा नवौँ निर्वाचन आयोजक किमिटी बन्ने तयारी भएपनि उमेर हदका कारण उहाँले राजीनामा दिने तयारी गर्नुभएको छ । सङ्घको विधानअनुसार ४० वर्ष उमेर पुगेपछि पदबाट राजीनामा दिनुपर्ने व्यवस्था छ ।
लामो समय असन्तुष्ट रहेका सङ्घका उपाध्यक्ष दिलु पन्तलगायतको टोलीको माग पूरा गर्ने बाचापछि यो पटक संयुक्त बैठक बसेको हो ।
बैठकमा उमेर हदबन्दी ४० वर्ष पुरा भएपछि स्वतः कमिटीबाट बिदा दिने वा के प्राबधान राख्ने भन्ने विषयमा छलफल भइरहेको प्रवक्ता कटुवालले जानकारी दिनुभयो । रासस