काठमाडौँ । नेपाली काँग्रेसका नेता एवम् नेपाल विद्यार्थी सङ्घका पूर्वउपाध्यक्ष उमेशजङ्ग रायमाझीको उपचारका लागि सहयोग सङ्कलनको क्रम जारी रहेको छ ।
आइतबार मात्रै नेपाली काँग्रेस जनसम्पर्क समिति दक्षिण कोरियाका तर्फबाट रायमाझीको उपचारका लागि दुई लाख रुपैयाँ उपलब्ध गराइएको छ । काठमाडौँमा आयोजित एक कार्यक्रमबीच जनसम्पर्क समिति कोरियाका केन्द्रीय सदस्य नवराज वाग्लेले दुई लाखको रुपैयाँको भौचर नेपाली काँग्रेसका केन्द्रीय सदस्य एवम् सभासद् धनराज गुरुङलाई हस्तान्तरण गर्नुभएको हो ।
सो रकम जनसम्पर्क समिति कोरियाद्वारा आस्था विन्दु मल्लको संयोजकत्वमा गठित सहयोग सङ्कलन समितिले जम्मा गरेको हो । सो समितिमा नवराज वाग्ले र जितु तिमिल्सेना उपाध्याय सदस्य रहेका थिए ।
काँग्रेस केन्द्रीय सदस्य तथा नेवि सङ्घका पूर्वअध्यक्ष धनराज गुरुङका अनुसार कलेजोमा खराबी देखिएपछि कलेजो प्रत्यारोपणका लागि दिल्लीमा रहेका रायमाझीको उपचारमा सो रकम खर्च हुनेछ । सम्पूर्ण उपचारका लागि एक करोडभन्दा बढी रुपैयाँ लाग्ने भएकोले थप सहयोगका लागि उहाँले आग्रह गर्नुभयो ।
सहयोग रकम हस्तान्तरण कार्यक्रममा गुरुङसहित काँग्रेस केन्द्रीय सदस्यसमेत रहेका नेवि सङ्घका पूर्वअध्यक्षहरु गोविन्द भट्टराई, गुरुराज घिमिरे, प्रदीप पौडेल र कल्याण गुरुङ तथा नेवि संघका पूर्वमहामन्त्रीद्वय मनोजमणि आचार्य र जितजङ्ग बस्नेत लगायतको उपस्थिति थियो ।
रायमाझीको उपचारका लागि सरकारले २५ लाख रुपैयाँ दिने निर्णय गरिसकेको छ । काँग्रेस केन्द्रीय सदस्य प्रदीप पौडेलका अनुसार नेपाली जनसम्पर्क समिति बेलायतले रु ११ लाख र चीन जनसम्पर्क समितिका अध्यक्ष राजन जम्मरकट्टेलले एक लाख रुपैयाँ उपलब्ध गराइसक्नुभएको छ । काँग्रेस सभासद्ले उनको उपचारका लागि एकमुष्ट रु १४ लाख ६१ हजार उपलब्ध गराउने भएका छन् । रायमाझी हाल नयाँ दिल्लीस्थित मेदान्त अस्पतालमा उपचाररत हुनुहुन्छ । रासस
0 comments:
Post a Comment