पार्टीको संसदीय दलको कार्यालय, सिंहदरबारमा बसेको बैठकले सर्वसम्मत र औपचारिकरुपमा नयाँ प्रधानमन्त्रीको उम्मेदवारका रुपमा अध्यक्ष ओलीलाई अघि सारेको हो ।
राष्ट्रपति डा रामवरण यादवबाट यही असोज १५ गते सातदिन भित्र सहमतिका आधारमा प्रधानमन्त्रीको चयन गर्न आह्वान गरेपछि एमालेले सो निर्णय गरेको पार्टीका सचिव प्रदीपकुमार ज्ञवालीले पत्रकारलाई जानकारी दिनुभयो ।
अध्यक्ष ओलीको नेतृत्वमा सरकार गठनका लागि अन्य दलसँग वार्ता र आवश्यक पहल गर्न अध्यक्ष ओलीकै संयोजकत्वमा वरिष्ठ नेताद्वय झलनाथ खनाल र माधवकुमार नेपाल, उपाध्यक्षद्वय वामदेव गौतम र विद्यादेवी भण्डारी रहेको पाँच सदस्यीय टोली पनि गठन गरेको उहाँले बताउनुभयो ।
अन्य दलले एमालेको उम्मेदवारलाई नमानेमा के हुन्छ ? भन्ने प्रश्नमा स्थायी कमिटीका सदस्य शंकर पोखरेलले भन्नुभयो, “प्रमुख दलका बीचमा १६ बुँदे सहमति हुँदा भद्र सहमति भएको कुरा सञ्चार माध्यमले नै स्थापित गरिसकेको छ, नेपाली काँग्रेसले आफैँ प्रधानमन्त्रीको उम्मेदवार दिन्छ भन्ने लाग्दैन, केही नेताले के भने भन्ने महत्वपूर्ण होइन पार्टी सभापति र प्रधानमन्त्री सुशीला कोइरालासँग भएको भद्र सहमति लागू हुने विश्वास लिएका छौँ ।”
अन्य दलले प्रधानमन्त्रीको उम्मेदवारी दिएमा विधिअनुसार संसद्मा कार्यबाही अघि बढ्ने पनि उहाँले स्पष्ट गर्नुभयो । बैठकले नयाँ संविधानअनुसार पार्टीका विधान र संरचनालाई व्यवस्थित गर्ने प्रक्रिया प्रारम्भ गर्न केन्द्रीय सचिवालयलाई जिम्मा पनि दिएको छ । रासस
0 comments:
Post a Comment